బిగ్‌బాస్ సీజన్-8 నిన్నటి ఎపిసోడ్ లో భాగంగా ముందుగా అర్జున్ కళ్యాణ్- అనుమిత హౌస్‌లోకి ఎంట్రీ ఇచ్చారు. తమ కొత్త సీరియల్ 'నువ్వుంటే నా జతగా' ప్రమోషన్స్ కోసం ఈ జంట హౌస్‌లోకి అడుగుపెట్టింది. ఇక వీళ్లిద్దరినీ హౌస్‌మేట్స్ ఆప్యాయంగా పలకరించారు. ముఖ్యంగా హీరోయిన్‌తో అవినాష్ గట్టిగానే పులిహోర కలిపాడు. ఇక వీళ్ల సీరియల్ కథ గురించి కాసేపు ముచ్చట్లు పెట్టారు. అలానే హౌస్ విషయాలు కూడా అడిగి తెలుసుకున్నారు. ఇక 'మా' పరివారం Vs బీబీ పరివారం మధ్య ఈ వారం జరిగే టాస్కుల్లో గెలిచి విన్నర్ ప్రైజ్ మనీని పెంచుకునే అవకాశం ఇచ్చాడు బిగ్‌బాస్. ఇందులో భాగంగా రూ.12489 రూపాయల టాస్కు ఒకటి పెట్టారు. ఇక ఈ టాస్కులో బీబీ పరివారం (హౌస్‌మేట్స్) గెలిస్తే ఆ 12వేల చిల్లర ప్రైజ్ మనీకి యాడ్ అవుతాయని.. లేకపోతే కట్ అవుతాయంటూ బిగ్‌బాస్ చెప్పాడు. ఈ టాస్కులో ప్రేరణ-నబీల్‌తో ఆడతామంటూ అర్జున్ కళ్యాణ్ జోడీ డిసైడ్ అయింది. తీరా టాస్కు ఏంటంటే ఒకరు డ్రమ్‌లో పడుకొని ఉంటే వేరొకరి దొర్లించుకొని వేరే ఎండ్‌కి తీసుకెళ్లాలి. అక్కడ ఉన్న విలువైన వస్తువులను వాళ్లు పట్టుకొని మళ్లీ ఇటువైపు దొర్లించాలి. ఇలా ఎక్కువ విలువైన వస్తువులను ఎవరు తీసుకొస్తారో వాళ్లు విన్. ఇక ఈ టాస్కు కోసం కొత్త సీరియల్ హీరోయిన్ డ్రమ్‌లో పడుకుంది. అసలే అలవాటు లేని ఆటేమో ఒకసారి దొర్లించేసరికి దెబ్బకి బయటికొచ్చేసింది. ఇక ఈ గేమ్ అయ్యేసరికి కళ్లు తేలేసింది హీరోయిన్. ఈ టాస్కులో బీబీ పరివారం గెలిచి ప్రైజ్ మనీకి రూ.12 వేల చిల్లర యాడ్ చేసింది.

అర్జున్ కళ్యాణ్ జోడీ వెళ్లిపోయిన తర్వాత అవినాష్ సరదాగా అందరూ దాగుడుమూతలు ఆడదామంటూ ప్లాన్ చేశాడు. దీంతో అందరూ దాక్కోగా అవినాష్ పట్టుకోవడానికి తిరిగాడు. ఇక మొత్తానికి అందర్నీ పట్టేసుకోవడంతో మొదట ఔట్ అయిన నబీల్ ఈసారి మిగిలిన వాళ్లని పట్టుకోవాల్సి వచ్చింది. ఈసారి దొరక్కూడదని అందరూ యాక్షన్ రూమ్‌లో దాక్కున్నారు. దీంతో ఎవరూ కనిపించక నబీల్ చాలాసేపు వెతుక్కున్నాడు. చివరికి ఒక్కొక్కరూ బయటికి రాగా నబీల్ ఔట్ చేశాడు. కానీ అవినాష్ బయటికి వద్దామంటే డోర్ లాక్ చేసి ఇరికించేశాడు బిగ్‌బాస్. ఏంట్రా ఇలా లాక్ చేశాడనుకొని అవినాష్ చాలా సేపు తలుపు తీయమని కెమెరాకి చెప్పుకున్నాడు. కానీ బిగ్‌బాస్ డోర్ మాత్రం తీయలేదు. పైగా లైట్స్ ఆపేసి, వింత వింత సౌండ్స్ చేసి గట్టిగానే అవినాష్‌ని భయపెట్టాడు. ముందు కాసేపు అవినాష్ కూడా కామెడీ చేసినా ఆ తర్వాత మాత్రం లోపల వస్తువులన్నీ గలగలలాడపోయాయ్. బిగ్‌బాస్ హార్రర్ సినిమా ఎఫెక్ట్స్ అన్నీ చూపించి అవినాష్‌ని భయపెట్టేశాడు. ఈ దెబ్బకి దండం పెట్టేసి ఇంకెప్పుడు ప్రాంక్‌లు చేయనంటూ అవినాష్ వేడుకున్నాడు. ఇక ఇదంతా టీవీలో చూసి తెగ నవ్వుకున్నారు హౌస్‌మేట్స్. 

కాసేపటికి ప్రభాకర్, ఆమని కలిసి తమ టీవీ సీరియల్ ' ఇల్లు ఇల్లాలు పిల్లలు' ప్రమోషన్స్ కోసం వచ్చారు. నిఖిల్‌తో మాట్లాడుతూ చెప్పు తమ్ముడు ప్రేమ పెళ్లా లేక అరెంజ్‌డ్ మ్యారేజా.. అంటూ ప్రభాకర్ అడిగితే లవ్ మ్యారేజ్‌యే ఇష్టమన్నా.. అంటూ నిఖిల్ సమాధానమిచ్చాడు. ఎందుకు.. అంటూ ప్రభాకర్ అడిగారు. దీనికి ఇష్టమంటే ఇష్టం దానికి రీజన్ అంటే ఏం లేదు.. ఇప్పుడు లవ్ అంటే ఆ పర్సన్‌తో మనం ట్రావెల్ చేస్తాం.. అర్థం చేసుకునే ఓ ఇది ఉంటుంది.. ఆల్రెడీ మనకి తెలుసు.. అందుకనే అంటూ నిఖిల్ చెప్పాడు. మరి పెద్దలు కుదిర్చిన పెళ్లి ఇష్టం లేదా అని ప్రభాకర్ అడిగితే నేను ప్రేమ పెళ్లి అయిన ఫ్యామిలీని ఒప్పించే చేసుకుంటానంటూ నిఖిల్ క్లారిటీ ఇచ్చాడు. ఇలా అందరు తమ అభిప్రాయాలను చెప్పుకొచ్చారు.